راپۆرت کەشوهەوا: ناجیگیری لە کەشوهەوای عراق لەی هەفتە
شفەق نيوز/ دەسەی کەشناسی و زەویلەرزەناسی عراق، راگەیان کە وڵاتەگە ئەوەسا کەفێدە کەشوهەوای ناجیگیر کە شیوەی وەهاری دیرێد، هەرلە ئمڕوو یەکشەممە 11ی ئایارەو تا شەوەکی پەنجشەممە 15ی ئايار.
مەزەنەیل وەگورەی ئەو راپۆرتە کە رەسیە ئاژانس شەفەق نیوز، باس ناجیگیری وەرچەویگ لەی ماوەی کەێد، کە وا وە گورجی هەڵکەێد، وەگەرد ئاڵشتبوین ئاشکرایگ لە تونی و رویکردنیڕ کە شایەت خوەڵوتووز هیز بەێد، وەتایبەت لە ناوچەیل خوەرئاوا و باشوور خوەرئاوا.
وەگەرد ئەو جویر ناجیگیریە، دەرفەت واران و هەوروتریشقە لە ناوچەیلیگ جیاجیا لە باکوور و خوەرئاوای وڵات پەیا بوود، کە شایەت بڕەسێد ئەرا بەشیگ لە ناوچەیل ناوڕاس.
مەزەنە کریەێد ئیوارە و شەو ئمڕوو یەکشەممە، لە خوەرئاوا و باکوور خوەرئاوا خوەڵوتووز هەڵکەێد، هاتێ تا رووژەیل دووشەممە و سێشەممە درەیژەو بوود تا بەشیگ لە شارەیل ناوڕاس و باشوور خوەرئاوا بگرێدەو، کە بوودە مدوو داوەزیان ئاست نووڕستن ئاسوویی.
وڵاتەگە لە رووژەیل یەکشەممە و دووشەممە بەرزەوبوین کەمیگ لە پلەی گەرمی توومار کەێد، ئمجا لە سێشەممەو تا جمعە داوەزیان وەرچەویگ وەخوەی دوینێد.
دەسەگە داوای مقیەتبوین کرد مەوقەی رانین لە کەشوهەوای خوەڵوتووز، و کەفتن لە وەر تەپوتووز، وەتایبەت ئەوانەگ بیماریەیل هەناسەدان دیرن.
