سودانی: تورکیا و سوریا رێککەفتن لەبان زیایکردن ریژەی ئاو ئەرا عراق
شەفەق نیوز- بەسرە
محمد شیاع سودانی، سەرۆکوەزیرەیل عراق، ئمڕوو چوارشەممە، لە کۆنگرەیگ رووژنامەوانی وت: تورکیا و سوریا رازی بوین وە زیایکردن ریژەی ئاو ئەرا عراق.
لە بەیاننامەیگ رووژنامەوانی تەلەفزیۆنی لە پەراورز سەردانەگەی ئەرا پارێزگاری بەسرە، سودانی راگەیان کە حکومەت عراق دەسکردیە وە "ریکارەیل چارەسەرکردن کەمی ئاو، سەرەتا وە چارەسەری دیپلۆماسی وەرد وڵاتەیل هاوسا وەتایبەت وەگەرد تورکیا، لە ری پەیوەندییەلیگ کە لە ماوەی گوزەشتە بوینە".
وتیش: "حکومەت تورکیا لە ری رەجەب تەیب ئەردۆگان، سەرۆککۆمار تورکیا، رەزامەنی داگە تا بەش ئاو نزیکەی 320 مەتر سێجا لە چرکەیگ ئەرا بەنداو موسڵ و 350 مەتر سێجا لە چرکەیەگ لە ری سنوورمانەو وەرد سوریا ئازاد بکرێد".
ئسودانی وتیش: ئومید خوازم ئی بڕە ئاوە کە رەسێدە عراق دەسمیەتی بەێد لە چارەسەرکردن کەمی ئاو چەمەیل دیجلە و فورات.
هەرلیوا، شەوەکی ئمڕوو چوارشەممە، مەحمود مەشهەدانی، سەرۆک پەرلەمان عراق پەیوەندییگ تەلەفۆنی وەرد نومان کورتولموش، سەرۆک پەرلەمان تورکیا وەپی رەسی، کە دەسکردن وە ئازادکردنی یەکەم تاقە ئاو زیایە ئەرا چەم دیجلە و فورات راگەیان.
نووسینگەی مەشهەدانی لە بەیاننامەیگ رەسیە ئاژانس شەفەق نیوز وت: ئی گامە لە چوارچیوەی جیوەجیکردن ئەو پشتە تیەێد کە لە گردەوبوین ناوەین مەشهەدانی و رەجەب تەیب ئەردۆگان، سەرۆک کۆمار تورکیا رێککەفتن لەباتی کریا، ئەرا زیایکردن ریژەی ئاو ئەرا 420 مەتر سێجا لە چرکەیگ.
مەشهەدانی سوپاس و پێزانین خوەی ئەرا سەرۆک کۆمار تورکیا و سەرۆک پەرلەمان تورکیا کلکرد ئەرا وەڵامدان زویوەزوی، وتیش: تورکیا هاوسایگ گرنگ عراقە و ئاسوو هاریکاریی ناوەین هەردوگ وڵات مەزەنەی دەرفەت زیاتر ئەرا هەماهەنگی هاوبەش کەێد ئەرا خزمەتکردن بەرژەوەنییەیل هەردوگ گەل.
