دوياترین کتاو رەحمەتی موحسن بەنیوەیس.. چوارینەی "بابا تاهر" وە پیت کوردی ئەرا یەکەمین جار

شەفەق نيوز/ لە ماڵ رووشنهویری و بڵاوکردن کوردی، یەکیگ لە دەزگایەیل وەزارەت رووشنهویری و گەشتوگوزار و ئاسەواری، کتاویگ وە ناونیشان "بابا تاهير عریان هەمەدانی" بڵاو کریا، کە نویسەر و رووژنامەنویس و پەروەدەکار ناودیار رەحمەتی موحسن بەنیوەیس وە زوان کوردی نویسادەی و شیەوکردن ئەرا واژەیلی دانا.

ماجد سورەمێری وەڕیەوبەر بەش نویسانن و بڵاوکردن لە ماڵەگە ئەرا ئاژانس شەفەق نیوز وت: نویسەر و شرۆڤەکار کورد موحسن بەنیوەیس رەشنویسیگ لە کتاوەگە ئەرا ماڵ رووشنهویری و بڵاوکردن کوردی لە کۆتایی ساڵ 2023 پیشکەش کردوێد، و پشت وە راسترین چاپەیل چوارینەی شاعر کورد لوڕ بابا تاهير هەمەدانی بەساوێد، کە  شرۆڤەکار حەسەن وەحید دەستگردی لە ساڵ (1880- 1962) پیشکەش ئەرای کردیە.

سورەمێری وتیش: بڕیار بوی پارەکە 2024 کتاوەگە چاپ بکریاتاد، وەلێ رەوشەیل سەختیگ نەیشت وەجی باێد، وتیش: وەداخەو نویسەر موحسن بەنیوەیس لە في 13 تەموور 2023 وەرجەیەگ دویاترین کەناوی بکەفێدە رووشنایی، دویاکووچی کرد.

دیاری کرد کە کتاوەگە گشت ئەو چوارینەیلە لەناوی بوی کە دڵنیایی لەلی دروس بویە کە چوارینەی رەسەن شاهێ بابا تاهير هەمەدانیە، وە زاراوەی کوردی لوڕی رەسەن خوەی، وەگەرد بڕیگ داهێنان شعر، وتیش: رەحمەتی موحسن بەنیوەیس فەرهەنگیگ ئەرا گشت واژەیل ناو چوارینەیل دروس کردوێد، و شیەوکردن پڕوپوختەیگ ئەرا واژەیلی وەزوان کوردی پیشکەش کەردوێد.

 وتیش: کتاوەگە 182 لاپەڕەس لە قەوارەی ناوڕاسین، و لە چاپخانەی ماڵ رووشنهویری گشتی سەروە وەزارەت رووشنهویری و گەشتوگوزار و ئاسەواری لە بەغداد چاپ کریا.

نویسەر و رووژنامەنویس و پەروەدەکار موحسن بەنیوەیس یەکیگیە لە نویسەرە دێرینەیل وە ژاراوی کوردی کەڵهوڕی فەیلی، کە لە داڵگبوی خانەقینە لە چلەیل سەدەی گوزەشتە.

 بەنیوەیس بڕیگ کتاو و هەڵگەردان دیرێد، لەناویان (ملوانک ئەڵوەن) کە لە ماڵ رووشنهویری و بڵاوکردن کوردی لە ساڵ 1988، کە زیاتر لە هەزار پەن وپیشان وە زاراوەی کوردی کەڵهوڕی فەیلی هاناوی، و وەرانوەری واتەی گشتی وە زاراوەی سۆرانی نویساس، هەمیش رۆمان (ریخ برایەتی) هەر وەو زاراوە.

 موحسن بەنیوەیس بڕیگ کتاو لە زوان کوردی ئەرا زوان عەرەبی و پێچەوانەیشەو هەڵگەردان کرد، بیجگە دەیان وتار و توێژینەوە لەناو گۆڤارەیل بەیان وروشنبيري نوێ کە لە ماڵ رووشنهویری و بڵاوکردن کوردی دەرچیان.

جی باسە کە نویسەر موحسن بەنیوەیس لە داڵگبوی خانەقینە، لە ناوڕاس چلەگان لە سەدەی گوزەشتە، و لە ئێڵ قەرەلوس کوردە، و خوەنەواری سەرەتایی لە خانەقین تەواو کرد، و لە بەعقووبە لە پارێزگای دیالە لە پەیمانگای ئامادەکردن مامووستایل دەرچگ، و یەکیگە لە مامووستا یەکەمەیل زوان کوردی دویای بڕیاردان خوەنەواری کوردی لە خانەقین دویای رێککەفتن 11ی ئازار 1970، و لەوەر هەڵوێستەیل نەتەوایەتیی تویش قەیریگ ستەم و زیندان و ئاوارەبوین ئەرا باشوور عراق هات، دویای شکست شووڕش ئەیلوول ساڵ 1975.

نویسەر موحسن بەنیوەیس لە 13ی تەمووز 2024، لەناو خەسەخانەیگ لە بەغداد دویای زیان دویرودرویژیگ وەرد بیماری، دویاکووچی کرد.