برادەریگ ئەلیکترۆنی یا رخدارییگ نادیار؟.. زیرەکی دەسکرد وە گەورەترین دەروازەیلەو چوودە ناو ژیان دویەتەیل
شەفەق نيوز/ هەر شەویگ روسول هادی، ئەو دویەتە، چوودە ناو ژوورەگەی خوەی، تا وەرد "chatgpt" قسیە بکەێد، کە بویەسە برادەر هەمیشەیی، خوەی لە مەردم جیاوە کەێد، تا چەن پرسیاریگ لەبان گیچەڵ سووز و کەسایەتی خوەی لەلی بکەێد.
روسول هادی (20 ساڵان) دی پاپەی قسەی مەردم و هاوڕیەیلی لە کۆلێژ نییە، و تەنیا بڕوا وە تەکنەلۆژیای ئەلیکترۆنی دیرێد، مە زیرەکی دەسکرد بویەسە ئەو شوین ئارام و هازدارە مە کلیلەیل چارەی گشت زیانەیلی دیرێد.
ئەو دویەتە کە خوەنەوارە لە کولێژ پەروەردەی وەرزشی، ئویشێد: بڕیگ مدوو هەس هیلن هەرشەویگ وەگەرد زیرەکی دەسکردا قسە بکەێد، تا دی واز لەلی نیارێد، و ختوورەیل دڵی ئەرای ئویشێد، چوینکە باوەڕ وە تاوانی دیرێد کە توەنێد لە خوەنەواری و کاروبار ژیانی دەسمیەتی بەێد.
لە قسەیلی ئەرا ئاژانس شەفەق نیوز، رەسول باس ئەوە کەێد کە وەکارهاوردن زیرەکی دەسکرد فرە بیوەیە، کە لەلاییگەو دروو نیەکەێد، و زانیاری راسی ئویشێد، و ئەو قسەوباسەیلە ئەرا کەسیگیش نیەوشێدەو، بیجگە ئەوەیش خوەم قمشی کەم هەرچەگ لە دڵم بوود وەبی دەسپاچە یا رخیگ وەپی بویشم.
دیاری کەێد کە زیرەکی دەسکرد بویە برادەرە خاسەگەم، و لە ژاوەژاو و قەیرانە بیبنەیل راسگانی پەنا وەپی بەم، کە قەت لە پرسیار و قسەیلم بیزار نیەوود، کە شەوانە زیاتر لە چوار ساعەت لەلی کەم.
زیرەکی دەسکرد وەخت گەنج و ناخاڵەیل بەێد، وەتایبەتی دویەتەیل، کە لەبان ژیان و گیچەڵەیل خوەیان لەلی پرسن، و وەسڵای کار کەن، و پشت وە زانیاریەیلی بەسن، کە گومان لەلی نەیرن.
زیرەکی دەسکرد، وەخت و رەنجەیل ئەو گەنجەیلە فەوتنێد، و هیلن لەجیای خوەیان هویرەو بکەێد، و قسەیلی چاپ کەن و وەبی گومان بڕوا وەپی کەن.
بەشیگیش پشت وە زیرەکی دەسکرد بەسێد ئەرا وەرزشکردنر کە زانیاری لەبان تەمەن و کیش و باڵا و سروشت ئەو وەرزشیە وەپی دەن کە ئارەزووی دیرن ئەرا گیانسووکی یا لەشجوانی، ئمجا زیرەکی دەسکرد بەرنامەیل وەرزشی وەگورەی ئەو زانیاریەیلە وەپییان دەێد، وەرد بەرنامەی خوەراکی.
هەکاتی روسول هادی، ئەو دویەتە وەناو "خیتام" لە تەمەن هەڤدە ساڵان، کە لە وەکارهاوردن زیرەکی دەسکرد زیای چوود، کە هیلێد لە وانەی مامووستا و خوەنستن کتاوەیل مەکتەو لەلایەو دەوڵەمەنتر بوود.
خیتام ئەرا ئاژانس شەفەق نیوز ئویشێد: وانەیل لە زیرەکی دەسکرد فرەتر لە مامووستا و کتاوەیل فامێد.
وتیش؛ واز لە قسەکردن وەرد چات زیرەکی دەسکرد نیارم تا خاس لەلی نەفامم، وەتایبەتی زیرەکی دەسکرد واتە و نموونەیل فرەیگ پیشکەش کەێد.
خیتام دیاری کەێد کە وەکارهاوردن زیرەکی دەسکرد لەلای من لە خوەنەواری ئەوبانە، کە لە رویداو و کاروبارەیل رووژانەم لەناو مەکتەو و جادەیلیش لەلی پرسم، و هەرچەگ قسەوباس لەناو خیزانەگەمیش بوود ئەرای ئویشم.
وەختیگ دیاریکریای ئەرا وەکارهاوردن زیرەکی دەسکرد لەلای خیتام نییە، کە وەقسەی خوەی، وەدرویژایی شەو و رووژەگە وەکاری تیەرێد و لەبان گشت چشتیگ لەلی پرسێد.
وتیش: ئی تەکنەلۆژیای ئەلیکترۆنیە هەمیش دەسمیەتییم دا لە خاسەوکردن پەیوەندی سووز، و هیشتیە لە کەسەیل فرەیگ دویرەو بکەفم.
پسپۆڕەیل دووپات کەن کە زیرەکی دەسکرد هیشت کەسەیل فرەیگ وەرۆ راسگانی و کەسەیل راسگانی رەفتار نەکەن، و یە وەگەرد رووزگارەو بوودە دابڕیان و خەمووکی.
لەی باوەتە، ئەحمەد زەهەبی مامووستای زانست دەروینی لە زانکۆی بەغداد ئەرا ئاژانس شەفەق نیوز ئویشێد: فرە لە گەنج و ناخاڵەیل وەتایبەت دویەتەیل، تەقەلا دەن وەرۆ زیرەکی دەسکرد قسیە بکەن وە کرعەی چارەیگ ئەرا گیچەڵەیل سووزداری و کۆمەڵایەتی و دەروینییان.
زەهەبی وتیش؛ وەکارهاوردن ئی تەکنیک ئەلیکترۆنیە زەرەدەیل دەروینی دیرێد، کە هاتێ شیواشیو دروس بکەێد، چوینکە زیرەکی دەسکرد چارە وەکەسیگ نیەێد کە لەناو ژیان و ژینگەیگ دیاریکریای دیرێد کە ئیەکە لەوەکە جیاوازە.
وتیش: ئامانج لەی بەرنامە ئەوە نییە بیلێد مەردم خوەشاڵەو بوون، بەڵکم تا درویژترین وەخت وەگەرد ئی بەرنامە بوون، تا وەکارهاوردن مۆبایل و کۆمپیوتەر و نابلیت و زیرەکی دەسکرد بوودە ئاڵوودەیی کەسەیل.
زەهەبی باس گرنگی مقیەتبوین لە وەکارهاوردن زیرەکی دەسکرد کەێد، چ لە مینەکردن چارەیگ بوود ئەرا گیچەڵەیل تایبەت، یا لە خوەنەواری ئەکادیمی، و وەرنەگردن ئەو زانیاریەیلا کە زیرەکی دەسکرد دەێدەی وەبی وەدویاچگن خاسیگ.
دیاری کەێد کە بڵاوبوین ماڵپەڕەیل سۆشیال میدیا و تەکنەلۆژیای ئەلیکترۆنی هیشت کەسەیل فرەیگ دویر لە مەردم بگرن، و لەجیای ئەوە کردنەی ژیان و پەیوەندییەیل ئەلیکترۆنی، و هەڵسوبتیشیتن تەنیا کەفتە گەرد ئەو شاشەی بویچکە.
وەگەرد ئەوەیش، ئەو کارەیل خاسە نیەشاریەنەو کە زیرەکی دەسکرد رانێد، لە رووشناکردن فرەیگ لە چینەیل خوەنەواری و زانیاری، کە دەسمیەتی لە مینەکردن زانیاری وە وەخت فرە کوڵیگ دەێد.
پسپۆڕ تەکنینکی، حەسەنێن مەزروع ئویشێد؛ چات جی پی تی، هەر گووگڵە، وەلێ کەسە کردگە و پڕ کریاس لە بڕ فرە گەورەیگ لە زانیاریەیل، لە جویراجویر چینەیل.
لە قسەیلی ئەرا ئاژانس شەفەق نیوز وتیش؛ هەناێ مینەی هەر ساڵیگ یا شوینیگ یا چینیگ زانستی کەێد، نووڕیمن کە زانایەیل زانیاری خوەیان لەو باوەتە پیشکەش کەن.
وتیش: ئەگەر ئەرا نموونە مینەی شاریگ یا شوینیگ شارستانی بکەێ، کەسەیل فرەیگ هەس ئەزموون و سەردان خوەیان ئەرا ئەو شوینەیلە باس کەن، ئمجا زیرەکی دەسکرد گشت ئەوانەگ لەبان ئی شارە یا ئەو شوینە نویساننە گردەو کەێد و ئەو زانیارییەیلە کە جویر یەکن خەێدە وەردەس.
مەزروعی دیاری کەێد کە زیرەکی دەسکرد فرە سوودبەخشە، چوینکە زانیاری پیشکەش کەێد، و وەختەگە کوڵبڕەو کەێد ئەرا مینەکردن، وەتایبەت ئەرا تۆێژینەوە و خوەنەواری ئەکادیمی.
وەلێ هوشدارییش دەێد کە بەرنامەی زیرەکی دەسکرد هەکاتی ئەو بەرنامەیل ئێنتیرنێت خاس و گەنی دیرێد، وەگورەی ئارەزوو و ئاگایی ئەو کەسە کە چوودە ناوی.
زیرەکی دەسکرد خوازێد رەفتارەیل مەردم بزانێد، تا ئاست پەیوەندی و کارایی وەرد وەکارهاورەیل بزانێد، وە جیوەجیکردن بەشیگ لە ئارەزووەیل دەروینییان لە گووشگردن لە دەسخوەشی و ئافەرین.
ئی بەرنامە لە فەلسەفەی دەروینی و بازرگانی تیەێد، خوازێد کەسەگە وە پەیوەندی وەردی بمینێد تا درویژترین ماوە، ئەرا وەدەسهاوردن ئامانجەیل بازرگانی.
پسپۆڕەیل هوشداری دەن لە کاریگەرییەیل بەد زیایچگن لە وەکارهاوردن ئەپڵەکەیشن زیرەکی دەسکرد، کە وەشیوەی زیاییگ وەباڵای ئەو کەسە ئویشێد کە خەیدەی کار، و هیلێد بڕیارەیلیگ چارەنویسی ناڕاس بوەێد.
